Toqqagassat ilisimakit

Spirali hormonimik akulik (IUS)

Spirali hormonimik akulik plastikkiuvoq mikisoq T-tut isikkulik, ukiut 3-5-it tungaannut hormoninik gestageninik annikitsukkaarlugit aniatitsisartoq. Nakorsaatissanut allagartaqarluni pissarsiarineqartarpoq, nakorsamillu imaluunniit peqqissaasumit illissamut ikkunneqartarluni.

Spirali kanngussak (IUD)

Spirali kanngussak plastikkiuvoq mikisoq T-tut isikkulik, kanngussammik allunaasartalik. Nakorsaatissanut allagartaqarluni tunniunneqartarpoq, kiisalu nakorsamit imaluunniit peqqissaasumit illissamut ikkunneqartarpoq, ukiunilu 5-10-t tungaannut naartunaveersaataasarluni.

Implanon

Silikone mikisoq qitulleraartoq ukiuni 3-it tungaannut hormoninik aniatitsisartoq. Nakorsaatissanut allagartaqarluni tunniunneqartarpoq, assaqqup iluatungaanut nakorsamit imaluunniit peqqissaasumit ikkunneqartarpoq.

Iisartakkat naartu-naveersaatit

Iisartagaaraq hormonimik ataatsimik akulik, imaluunniit iisartagaq katigutaq hormoninik marlunnik akulik, nakorsaatissanut allagartaqarluni pissarsiarisartagaq, namminerlu nakkutigineqartartoq, ullullu tamaasa piffissami aalajangersimasumi iineqartartussaq.

P-kapuut qaammatini pingasuni atuuttoq

Kapuut hormonimik/hormoninik akulik, nakorsaatissanut allagartaqarluni tunniunneqartartoq, qaammatillu tamaasa imaluunniit qaammatit pingasukkaarlugit nakorsamit imaluunniit peqqissaasumit isumagineqartartoq.

Pessari

Silikone qaarajuttutut isikkulik utsummut ikkunneqartartoq, taamaasillunilu peersat illissamut apuunnissaannik pinaveersaartitsisuulluni. Ilaat nakorsamit imaluunniit peqqissaasumit ikkunneqartaraluartut, amerlanerpaat nammineq ikkunneqartarput nakorsaatissanut allagartaqarluni pissarsiarineqartarlutik, kiisalu atoqatigiinnginnermi 24 tiimit sioqqullugit ikkunneqarsinnaallutik.

Nuvaring

Nuvaring mikisuuvoq peqikkuminartoq, nakorsaatissanut allagartaqarluni pineqartarpoq namminerlu ilumut ikkunneqartarluni, tassani sapaatit akunneri pingasut hormoninik aniatitsisarpoq.

Arnamut usuup puua

Usuup puua ilumut ikkuttagaq, utsuup iluani inissisimagaluarluni angutinut usuup puua assigalugu atuuttarpoq. Nammineq isumagisassaavoq nakorsaatissanullu allagartaqaqqaarnani pisiarineqarsinnaalluni.

Usuup puua

Usuup puua usummut tissaqqasumut atitinneqartarpoq, peersap utsummut pinissaa igalassimasarlugu, naartunaveersaatinittaaq kisiartaalluni kinguaassiutitigut nappaatinut illersuutaalluni. Nammineq isumagisassaavoq nakorsaatissanullu allagartaqaqqaarnani pisiarineqarsinnaalluni.

Nammineerluni naartunaveer-saarneq

Nammineerluni naartunaveersaarneq nammineq aqunneqartoq, tassani ilaallutik ullut naartulersinnaaffiit paasiniarlugit aaqartarnermik nakkutiginninneq aamma timip kissarneranik nakkutiginnittarneq.

Tunuarneq

Aamma ‘iluanut inernani naartunaveersaarnertut’ taaneqartartoq, naartutitsinaveersaarnermi tamatumani nammineq aqunneqartumi, naartutitsinissaq pinaveersaartinniarlugu anisuunnginnermi usuk amuneqartarpoq.

Arnamik kinguaassiorsinnaajunnaarsitsineq

Naartusinnaajunnaarsinneqarluni mannissap aqqutaanik qilertilluni suliaritinneq, nakorsamit imaluunniit peqqissaasumit suliarineqartartoq.

Angummik kinguaassiorsinnaajunnaarsitsineq

Peersap aqqutaanik qilertilluni suliaritinneq, nakorsamit imaluunniit peqqissaasumit suliarineqartartoq.