ANGUMMIK KINGUAASSIORSINNAA-JUNNAARTITSINEQ
Aaqqiissut ataavartoq.
PEERSAQ AALLARTIFFIMMI UNITSINNEQARTARPOQ
Angutip kinguaassiorsinnaajunnaartinneqarnera aamma vasektomi-mik taaneqartarpoq, naartutitsinaveersaataallunilu pilatsinnikkut pisartoq ataavartorlu. Naartutitsinaveersaat anisuup aqqutaanik qiorsinermik imaqarpoq, kinguaassisaat inernermi issunnit usummut ingerlaarfianik. Suliaritinneq sumiiffimmik ilisimajunnaartitsilluni pisarpoq. Naartutitsinaveersaat ataavartuummat sunniuteqarluartuummallu, meerartaarusunngilluinnartunut imaluunniit meerartaaqqikkusunngitsunut periarfissaavoq.
Suliaritereernermi angut suli inersinnaassaaq, peersarli kinguaassisaatinik mannissamik kinguaassaqalersitsisartunik imaqassanngilaq. Kinguaassiorsinnaajunnaartitsineq angutip naartutitsisinnaaneranut taamaallaat sunniuteqassaaq, atoqateqarnissamullu kajumissusaanut imaluunniit piginnaasaanut sunniuteqassanngilaq, aalajanginnginnermili nakorsap oqaloqatigeqqaarnissaa pingaaruteqarpoq. Iluaqutit akornutillu pillugit eqqarsaatigilluarnissaanut nakorsaq ikiuussinnaassaaq, kiisalu naartunaveersaatit allat sivisuumik atuuttartut, soorlu ass. spirali hormonimik akulik imaluunniit spirali kanngussak pillugit siunnersuisinnaassalluni. Ilaatigut vasektomi allanngortinneqarsinnaasarpoq, suliaritinnerli ajornakusoortorujussuuvoq, qularnaveeqquteqartitsisoqarsinnaanngilarlu.
SUNNIUT NALINGINNAASUMIK ATUINEQ
Hormonit
Angummik kinguaassiortitsisinnaajunnaarneq hormoninik atuiffiunngilaq.
Atornera
Angummik kinguaassiorsinnaajunnaartitsineq ataavartuuvoq. Suliaritereeraanni allamik iliuuseqartoqarsinnaajunnaartarpoq.
Aaqartarnerit
Angummik kinguaassiorsinnaajunnaartitsineq aaqartarninnut sunniuteqanngilaq.
Angut kinguaassiorsinnaajunnaartinneqareeruni naartutitsinaveersaammik allamik atugaqassava?
Aap. Suliaritinnerup kingorna qaammatini siullerni pingasuni naartunaveersaammik suli atuisoqassaaq.
Kinguaassiorsinnaajunnaartitsineq atoqatigiinnissamut kajumissutsimut sunniisarpa?
Naamik, kinguaassiorsinnaajunnaartitsineq atoqatigiinnissamut kajumissutsimut sunniineq ajorpoq, angutillu suliaritinnini qaangereeruniuk, qangatulli atoqateqarsinnaanngoqqissaaq.
Kinguaassiorsinnaajunnaartitsineq allanngortinneqarsinnaava?
Kinguaassiorsinnaajunnaartitsineq aaqqiissutitut ataavartutut allanngortinneqarsinnaanngitsutullu eqqarsaatigineqarpoq, taamaattumik siunissami meerartaarusukkaanni, naartunaveersaat alla toqqarneqartariaqarpoq. Kinguaassiorsinnaajunnaartitsinerup allanngortinnissaa ajornakusoortorujussuuvoq.
Kinguaassiorsinnaajunnaartitsineq sunniuteqarnersoq misissorneqarsinnaava?
Nakorsap peersaq mikroskopikkut misissussavaa, angutip peersaa kinguaassisaatinik suli imaqarnersoq takuniarlugu. Misissuinerup kinguaassisaatinik imaqanngitsoq takutippagu, kinguaassiorsinnaajunnaartitsineq atuussimassaaq. Suliaritereernerup kingorna peersap misissortinnissaa innersuussutaavoq.
Angutip kinguaassiorsinnaajunnaartinneqarnerata sunniutaa atorunnaarsinnaava?
Kinguaassiorsinnaajunnaartitsineq ataavartumik aaqqiissutissatut naatsorsuunneqarpoq, qaqutigulli anisuup aqqutaa ataleqqissinnaasarpoq. Taamaattoqarpat, suliariteqqinnissaq pisariaqassaaq.
Kinguaassiorsinnaajunnaartinneqarsimagaanni suli inertoqarsinnaava/anisoortoqarsinnaava?
Aap, kinguaassiorsinnaajunnaartinneqarneq inernissamut/anisoornissamut piginnaasamut sunniuteqarneq ajorpoq.
Kinguaassiorsinnaajunnaartinneqareernermi suli anisoortoqarsinnaava?
Aap. Suliaritereernerup kingorna iluaagusuttoqalaarsinnaavoq, kisianni kinguaassiorsinnaajunnaartinneqarneq inernermi anisuup annertussusaanut malunnartumik allannguinavianngilaq.
Kina kinguaassiorsinnaajunnaartitsisarpa?
Suliaritinneq nakorsamit ilinniarsimasumit ingerlanneqartarpoq.
Kinguaassiorsinnaajunnaartinneqareernermi suna naatsorsuutigisinnaavara?
Suliaritereernermi pilannerit marluk maminnissaat utaqqineqassaaq. Suliaritiffimmi anniarneq imaluunniit pullattoorneq, peersami aaqarneq imaluunniit issunni aap katersuunnera aarlerinaataasinnaapput. Taakku piffissap ingerlanerani aaqqissapput. Aamma aarlerinaataasinnaavoq, suliaritereernermi suli kinguaassiorsinnaanissaq.
SIUNNERSORNEQARNISSAQ PISARIAQARTIPPIUK?
Peqqissaanermik suliaqartoq oqaloqatigiuk
PAASISARIAQAKKATIT
1775
Ukioq kinguaassiorsinnaajunnaartitsiffiusoq siulleq.
Nul
Angutip kinguaassiorsinnaajunnaartitaasimasup anisuua kinguaassisaateqanngilaq.
10.000
Nunarsuaq tamakkerlugu vasektomiit suliarineqartartut amerlassusaat missingerlugit.
- Ataavartuuvoq.
- Akornuserneqarani atoqatigiittoqarsinnaavoq.
- Hormoninik akoqanngilaq, arnanullu hormoninut atatillugu saniatigut kissaatiginngisanik sunnerneqartartunut periarfissaalluni.
- Naartunaveersaat aaqartarnermut sunniuteqarneq ajorpoq.
- Nakorsap suliarinninneq isumagissavaa, ilisimajunnaartitsinertaqarpoq.
- Uterteqqinneqarsinnaanngilaq.
- HIV/AIDS-imut imaluunniit kinguaassiutitigut nappaatinut allanut illersuinngilaq.
KALAALLIT NUNAANNI NAARTUNAVEERSAATIT AKEQANNGILLAT
- NAARTUNAVEERSAATIT ATORSIGIT IMMISSINNULLU PAARALUSI
Nalunngiliut usuup puuinik atugassannik akeqanngitsumik, piffissamik inniminneeqqaarnak napparsimavimmut aalliinnariaallutit?
Usuup puuata saniatigut naartunaveersaateqarnissat pitsaassaaq. Kalaallit Nunaanni iluanaarputit naartunaveersaatit assigiinngitsut akeqanngitsumik pisinnaagakkit, ilinnut tulluartut toqqarsinnaallugit.
P-pillit ullut tamaasa iisassaapput. Eqqaamasinnaaneq ajorukkit imaluunniit ullut tamaasa iisisarnissat aporfigigukku, naartunaveersaatit attartuut toqqarsinnaavatit, assersuutigalugu hormonspirali imaluunniit p-stavi. Hormonspirali ukiunit pingasunit ukiut arfinillit tungaannut atasarpoq, apeqqutaalluni sorleq atornerit.
Naartunaveersaatit pillugit peqqissaasumik oqaloqateqarit, paasisaqarfiginiassavatit. Atoqatigiinneq nuannernerpaasarpoq, atoqatigeereeraanni kinguaassiutitigut nappaatit imaluunniit naartunissaq eqqarsaatigisussaanagu.
